Жыць...

 

30.09.2021

 

Ляцець бясконца

І падаць…

Бачыць сонца

Апошнім…

І, зноўку,

Аджываць,

З’яўляцца

І зьнікаць…

Імгненьнем

Кожным…

Дарога

29.09.2021

 

Дарога…

Убачыш штосьці,

Што так знаёма,

І сэрца ахопіць

Пачуцьцё суму:

Дзесьці побач месца,

Што называў домам…

Хопіць!

 

27.09.2021

 

Радзіма, доля,

Тут няволя,

Бы стаю адзін у чорным полі,

І чакаю сонца промні…

Імчыце безь мяне, коні,

Ахапіла болем скроні…

Вольную абраў, ці Волю?

Жыць, ці век шукаць спакою…

Хопіць?! “Хватит?!”

Ды чаго чакаці, браце!?

Прыйдуць забіваці,

Будзеш енчыць: «Маці»…

Толькі кожны з вас

Ва ўскрайнай хаце…

Заўтра

 

27.09.2021

 

Заўтра наш прыйдзе час,

Заўтра працягнем бой,

Заўтра кожны з нас,

Заўтра ўсяк герой…

Толькі, дзе мы, а дзе заўтра?

Зараз жыві сабой!

Мой дом...

 

26.09.2021

 

Неба чыстае,

Як жывое,

Паветра празрыстае

Побач з табой,

Маёй зямлёй,

Домам,

Што там, за ракой,

Цішынёй

За яго сьцяной…

Абыякасьць

 

24.09.2021

 

Забівае ня толькі зброя,

Цягне ў бездань няспынна час…

Забірае ня роспач і гора,

Абыякасьць зьнішчае нас…

Сьпявай!

 23.09.2021

 

Сьпявае бясконцае неба,

Сьпявае лісьцё на гальлі…

Сьпяваюць хуткія рэкі,

Сьпяваюць ральля й палі…

Сьпявае праменямі сонца,

Сьпяваюць зьнічкі – агні…

Сьпяваю й я зь імі,

Сьпявае жыцьцё на Зямлі… 

Вечнасьць

 

22.09.2021

 

Па мінуце

Зьнікае ў цемры жыцьцё…

Глядзі, не глядзі,

Яно ўжо небыцьцё…

Бясконцасьць магчымая,

Толькі б знайсьці сьмеласьць…

Аддаўшы ўсё,

Атрымаеш сябе,

Гэта й ёсьць

Вечнасьць…

Жыць!

 

20.09.2021

 

Падлогу кранаюць нясьмела ногі,

Якія так сумавалі

Бяз новай дарогі,

Жыцьцё нам прынесла

Яшчэ адзін дзень,

Я больш не сумую,

Пасьпей за мной, цень!

Быць сабой

 

20.09.2021

 

Быць цэлым сусьветам,

Калі ты адзін,

Хто рады дасьць,

Хто дапаможа?

Ня трэба адмовак шукаць і прычын,

Заранкі з’яўляюцца ў кожным зь мясьцін,

Будзь проста сабой,

Будзь прыгожым…

Сінгулярнасьць

 

16.09.2021

 

Гэтыя вочы

Забралі спакой,

Я адчуваю радасьць…

У гэтым блакіце

Жыцьцё за сусьвету мяжой,

Сінгулярнасьць…

Бяжы

 

16.09.2021

 

Для адных трошку свой,

Для астатніх чужы…

Я застаўся навекі

Блукаць на мяжы…

Мой апошні герой,

Усё кідай, і бяжы…

Толькі шчасьце, ад смутку лекі,

У сэрца лажы…

Я тут, а ты там...

 

13.09.2021

 

Зноўку ты там,

Ня побач…

Зноўку згарае храм…

Зноўку жыцьцё,

І роспач,

Зноўку я тут,

А ты там…

Попелішча

 

08.09.2021

 

Там, дзе гарэла зямля,

Не сьпяваюць больш галасы…

Хаджу тут моўчкі й я,

І, толькі подых сівой кудасы,

Сярод аскепкаў гнільля,

Фарбуе дрэваў старых валасы…

Быць...

photo @litdenmat (c)

 

30.05.2021

 

Хацелася б проста быць…

Ня думаць пра лепшае, горшае,

Супраць ці разам плыць…

 Я з вамі й так, па дарозе

Таксама здольны хадзіць,

Незалежна ад веяньня ў модзе…

Ёсьць толькі жывое, якім трэба жыць…

Час прыйдзе й нам аддзячыць прыродзе,

Зь якой мы ня ў згодзе, а трэба любіць…

Той жар, што палае ў сэрцы,

Не загубіць, а дарыць…

Дзесьці там...

 

14.09.2021

 

Целам нібы тут,

Але за цішыню

Ўсё аддам…

Кожную зь мінут

Я духам

Дзесьці там…

Пішы

 

15.03.2021

 

Пакідаючы частку душы,

Не крычы…

Прыйдзе час гаварыць,

Назірай, і маўчы…

Не шукай пэўны шлях,

І ад шчасьця ключы….

Колькі хопіць жаданьня дыхаць,

Пішы...

Да зор...

 08.09.2021

 

Хачу да зорак…

Мне так знаёма

Бясконцасьць…

Прырода са мной,

Я побач…

Дзе б я ні быў,

Я дома…

Мы выдумалі...

 

11.09.2021

 

Мы выдумалі ўвесь сусьвет

Такім, якім хацелі яго бачыць,

І сябе ў ім…

Так прагнем быць далей,

Чым нетаемны сьвет,

Што блізкае ня бачым,

Толькі дым ад попелішча

Напамін…

Жыць...

 

10.09.2021

 

Зноўку новы ранак,

Зіхаціць паветра,

Адчуваю водары вясны,

І подых ветру

Мне крануў зь пяшчотай валасы,

Я ў імгненьні кожным чую

Душаў Вашых галасы…

Колер Тваіх Вачэй...

 09.09.2021

Я хацеў ба ўбачыць зноўку

Што ўсяго даражэй,

Што малюю ў сшытках алоўкам

Цягам бяссонных начэй…

Што зіхцее блакітным шоўкам,

Толькі за тканку ярчэй!

Я хацеў ба ўбачыць зноўку

Колер тваіх вачэй…

Існую.

 

06.09.2021

Я толькі частка сябе,

Штось блукае

Там, пад зоркамі,

Штосьці ў цемры згасае,

І, часткай сябе,

Я гуляю

Ў небе вясёлкамі…

Штосьці там,

У вадзе,

І сьпявае золкамі,

У паветры,

У кожным сьне

Існую адломкамі…

За Гарызонтам...

 

07.09.2021

Словы – вада

На каменьні,

Як зьнічкі,

Жывуць імгненьні,

І падае зь неба

Ня чутна сьляза…  

Да гарызонту толькі цені,

А ты пашукай За…

Музыка

 

06.09.2021

 

Мы ствараем музыку…

Нам сэрцы шэпчуць гукі,

Нотамі празрыстымі,

Пачуцьці, рухі…

Як пяшчота ў летні дзень,

Кранаюць рукі…

Прыгажэй нас толькі цень,

І ценю гукі…

Іншапланецяне

 

02.09.2021

 

Ты чакаеш іх кожны дзень,

У мэтро, у натоўпе шукаеш,

Адчуваеш іх побач часам,

Яны як цень,

Тыя, хто дапамогуць,

Іншапланецяне…

Мае Чэрці

 

02.09.2021

 

Усе мае чэрці

Жывуць са мной у згодзе,

Яны – галасы,

Што сьпяваюць ноччу,

Калі я пішу,

І бачу сны…

Я з Табой

31.08.2021

 

Ты ўсё маё шчасьце,

Жыцьцё, надзея,

І ўвесь спакой…

Я тут,

Я побач,

Я з Табой…

Атмасфэра Бясьпекі...

 

30.08.2021

 

Гэты цень ад дамоў паглынае сьвятло,

Дзе нідзе дагарае промнямі вечар,

Я штоноч адчуваю, як хутка жыцьцё

Пакідае нас, зьнічкі спаліўшы ў сваёй печы…

 

Гэты шэпат дарог забірае спакой,

Цішыня зараз там, дзе згараюць сьвечкі

Толькі словы, на досьвітку чутныя, “Я з табой”

Непраўдзіва ствараюць атмасфэру бясьпекі…