Публікацыі

"Я - МОВА" - публікацыя ў часопісе "Дзеяслоў"

Вершы друкаваліся ў часопісе "Дзеяслоў" нумар 119 (4\22)

***

Я пішу…

Шамаценьне ядвабу белага.

Пер’я рыпаньне –

Песьня ў вушшу…

Атрамэнту адценьня сьпелага

Гукаў сыпаньне –

Я пішу…

***

Адпусьці

Нэрвы

Вецьцем крывым,

Дрэвамі,

Прырасьлі,

Не прайсьці.

Крык…

Гукі - лісьцё

Зрывае паперамі –

Верш

“Адпусьці”

***

Рай

Я напішу колькі-сь літар

Ня модных.

Хай  паміж намі бессань –

Паперы сьпісанай гай…

Я пражыву кожны момант

Свабодным

Хай паміж намі бездань –

Паветра над ёю Рай.

***

Мова нашых думак –

Бліск жыцьця вады…

Чыстая, свабодная,

Мова – нашы сны.

І

Я

Жывы.

***

Я ў музыкі гуках шукаю жыцьцё.

Ў паветраным рытме танцаў…

Успамінам прамчыць за імгненьне адно,

Не пакінуўшы мне ані шансу…

***

Разьбірай мяне цалкам,

"Я" - з гукаў выслоўе...

Забяры мяне зараз,

"Я" - толькі сюжэт.

Забяры мае вочы,

І "Я" - мой голас,

Забяры маё ўсё!

Я

НЕ

ЧАЛАВЕК!

***

Твор

Вашу “стабільнасьць” –

З хаты на двор.

Жывы Сусьвет –

Найлепшы Твор!

***

Ціха кроплямі

Дождж на дахах

Танцуе вальс...

Адкладаю справы -

Потым...

На тое час...

За вакном,

З бэтону соты,

Я пачую твой Раманс,

Прад вачамі гукі - ноты,

А потым скажуць:

Дэкаданс...

***

Я - МОВА

Я –

Толькі слова ў цішыні,

А слова –

Гукі ў вышыні

Пачуцьцяў –

Мова…

Я –

Бліскаўка ўдалечыні,

А Мова –

Сьлед у цішыні,

А сьлед –

                            Размова…

***

Шукаю мяжу

Сваёй

Адзіноты...

Што гэта?

Крыжыкі?

Ноты?

Літары.

Я дапішу,

Але

Потым...

30 красавіка 2021

Мае вершы ў ЛіМ №3(5160) ад 21 студзеня 2022

Мае вершы ў часопісе "Дзеяслоў" №114 (5-21)