Зельле

 

01.11.2021

 

Пер’ем белым ток

Сьцеле…

Ме́лін лёсаў сноп

Зьмеле…

Белым будзе сок -

Зельле

Ў кожным, без жыцьця,

Целе…

Тыя, хто забіраюць сны...

 

23.11.2021

 

Ноччу гукі зьнікаюць,

Згасаюць агні...

Пакрысе ажываюць

Тыя, хто забіраюць сны…

Яны моўчкі чакаюць

Цемры, мроку, імглы…

Ты ня сьпіш і шукаеш

Выйсьце з гэтай вайны…

Вада - бясконцасьць

 

06.11.2021

 

На гэтай плянэце

Толькі вада…

Хто плавае,

Век пражыве.

У гэтым сусьвеце

Ні межаў, ні дна,

Бясконцасьць…

Зьнік – аджыве…

Попелішча

 

08.09.2021

 

Там, дзе гарэла зямля,

Не сьпяваюць больш галасы…

Хаджу тут моўчкі й я,

І, толькі подых сівой кудасы,

Сярод аскепкаў гнільля,

Фарбуе дрэваў старых валасы…

Матылькі

 

10.08.2021

Матылькі па-за шклом,

Ня бачна падману і дна.

Сіла сказаных словаў раніць,

Але, забівае віна.

Мастацтву Быць!

 

14.05.2021

 

Мастацтву быць!

Яно аднойчы пераможа…

Сьвятлом напоўніць кожнага навек…

Патрэбна жыць!

Я літары складаю асьцярожна,

Каб зь іх урэшце выйшаў Чалавек!

Страх

 

10.04.2021

 

Горад паглынаюць цені,

Сьпі,

Нават ня думай,

Не выходзь,

Ня дыхай…

Бо пачуюць,

Арыштуюць,

Зьнішчаць…

Зноў і зноў маўчыш,

Сьціраючы сьляды…

Хтосьці ўжо палюе,

І наступны Ты…

Дзяніс Мацеша

@litdenmat