Хай ілюзія гэтая сон

        01.10.2022

 

Мы ўроілі сонца й дом –

Хай сустрэнемся ўвечары зноўку

На ганку

Імгненьнем відзежы быцьця…

 

Хай ілюзія гэтая сон,

Я з Табой застануся ў крозах

Да ранку –

Апошняе ночы Жыцьця…

 

СЛОВЫ

 

14.07.2022

 

Мікраць-сон, небыцьцё…

Толькі словы-чароды пахаў,

Што сьпявае Жыцьцё,

Ёсьць назовы пачуцьцяў-птахаў…

НЕ ПАМЁР - ЖЫВУ

 

24.10.2022

 

У прастору касьмічнае шлю

Невымоўнае зорам,

Што згасаюць чароўным сьвятлом –

Карагод агню…

 

Такжа й я на ўсходках сыду

Незаўражаным словам…

Вецер шэпатам-лісьцем сьпяе:

Не памёр – Жыву…

Я З ТАБОЙ

 

17.10.2022

 

Мрэе лес…

Там, дзе месяц і сон

Па-над целам ракой -

Супакой…

 

“Я” Жывы…

Палымее пяшчота

Й пошугаў рой,

Я з Табой…

СЬВЯТЛО Й КАХАНЬНЕ

 

25.08.2022

 

Мы – ня тая любоў,

Што да неба імкненьне

Й Раю чаканьне,

Мы – Паветра й поўныя

Чуцьцяў Свабоды імгненьні –

Сьвятло і Каханьне.

Я БУДУ З ТАБОЮ

02.08.2022

Лесам маўклівым

З травою жывою

Я буду шчасьлівым

"Я" будзе з Табою...

НЕБА

 

29.07.2022

 

У тумане няпомным ня бачныя твары,

Хомар белы ліецца са страчаных душ…

Мне бракуе  спрамогі пазбавіцца хмары –

Пачынаю шукаць неба ў адсьвеце з луж…

ПОШУГ НАШЫХ КАХАНЬНЯЎ

 
01.08.2022
 
На пазвышшы жаданьняў,
Ў начной цішы
Пошуг Нашых Каханьняў,
Мы сьпім?
                    - Пішам…

НЕПРАВОЛЬ МНЕ ЦЯПЕР СПАЗНАВАЦЦА

 

16.07.2022
 
Неправоль мне цяпер спазнавацца,
Чалавекам “Я” ёсьць, або Зьвер
Прымушае ісьці й змагацца,
Бо Жыцьцё не ўзяць напавер…
 
Мы дачасныя, міг зазявацца,
Як зьлічво скончыць дым ці кар’ер…
Лес пасьветчаньнем будзе хістацца,
І сьпяе па-над дрыгвай аер…

МЭЛЁДЫЯ НАШАГА СНУ

 07.06.2022

Я сказаў:

Гэта сон.

Адказала:

Ілюзія сну...

Я шукаў

Не жыцьцё.

Мы шукалі

Мэлёдыю

Нашага сну...

Зьмяняецца мова

13.06.2022

Лес замоўк,

Распусьціўся і зьнік…

У пачуцьцях

Нябачная схова…

То ба то

Ўсьміхаецца месяц-грыбнік…

Час спыніўся –

Зьмяняецца Мова…

Мова - Жыцьцё

 

23.05.2022

 

Сэрцам пачутыя словы:

Блізкія, новыя…

Мова Наша – пачуцьці

Бязьмежныя, каляровыя...

Наша Мова – Жыцьцё!

І Мы Сьвятлом поўныя.

Closer to You…

 

21.05.2022

 

Бліжэй за размову

Толькі маўчаньне –

Знаёмыя сэрцу

Надзея й сум…

 

Бліжэй за свабоду

Толькі прызнаньне.

Паветра зьнікае – быць

Closer to You…

Я З ТАБОЙ

 

16.05.2022

 

Я з Табой

 

Пах не сказаных словаў,

Кветкавых, пачуцьцёвых…

Водар блізкі, знаёмы…

Я з Табой –

Я дома.

Ne verba pro farina

 09.05.2022 (Ne verba pro farina)

 

Сама сябе ня даглядзіць

Парэчка ды маліна.

Гарбату трэба саладзіць –

Ne verba pro farina.      

(Прыўвершы)

Я ЛЮБЛЮ ТЫЯ ВОЧЫ

05.05.2022 

Я люблю
Тыя вочы,
Што ў марах
Штодзённа й поўныя
Поўняю ночы…
Люблю
Тыя вочы…

ПРЫЎВЕРШЫ :)

 
24.04.2022  (Прыўвершы)
 
Высока ляцець,
Ды падаць нізка…
Блізка ды блізка,
Але, каб не было сьлізка.

...

ХАЧУ БЫЦЬ...

 

25.04.2022

 

Я не жадаю жадаць,

Жаданьні спыніць…

Калі ж адчуваю цябе побач –

Хачу "БЫЦЬ"…

Ня роў, не эміграцыя

 
19.04.2022
 
Яны ў жартах толькі
Чулі слова “Нацыя”…
Мне б хоць у вершах захаваць яго!
Жыцьцё – ня роў, не эміграцыя…

.

ПРАЖЫЦЬ ДЗЕНЬ

 

17.04.2022
 
Адзін верш да сьвітаньня…
Абноч сьцень…
І, зноўку, імгненьні да новага раньня -

Пражыў дзень…

СВАБОДА \ FREEDOM

 
10.04.2022
 
Мы з Табой, Я і Ты –
Кожны ў сваёй клетцы
Сотавай цемнаты,
Сьмецьця…
 
Мы з Табой, Я і Ты –
Кожны ў чужым сэрцы,
Зрушанай пусьцінёй
Сьмерці…

ВАЙНА (Вершы-Спарышы\Двайчаткі)

03.04.2022

1.Вайна

 

Вецер зьдзьме

З падваконьня попел…

Сьвет сказіць

Павучыньне-шкло…

 

На далоні

Ў Анёла кроплі –

Не пасьпеў

Затуліць жыцьцё…

 

2.Вайна

 

Вецер дзьме,

Ў паветры попел…

Шыба шчэрбамі

Рэжа сьвятло…

 

На далоні

Ў анёла кроплі –

Ў кожнай

Страчанае жыцьцё.

KINGDOM IN BLUE

 

08.04.2022

 

Блакітныя горы-вежы,

Блакітныя неба й сьлед,

Што пакінулі колы блакітных машын…

 

Блакітныя думкі й межы

Блакітнага сонца й сьнег

Ад сьляпога блакіту блакітных вітрын…

 

Блакітныя пахі-ежа,

Блакітны празрысты Сьвет,

Што ў думках блакітных жыве – успамін.

ДЗЕСЬЦІ ТАМ

 

02.01.2022

 

цыкл ІЛЮЗІЯ

 

Людзі хто моўчкі,

Хто з крыкам,

Зьнікаюць –

Часу туман.

 

Фота зьмяняюцца

І паміраюць –

Дзесьці там

І я сам…

ПАЦАЛУНАК

19.12.2021
 
Неба з адтуліны.
Поўня малюе сьвятло,
Вэ́льмам ліецца няроўным
На сьцены і
Цела маё…
Раптам зазьзяла сьняжынка,
Сустрэўшы вакно –
Сьвяточны зімы пацалунак
Скрозь краты і
Шкло…

 Прысьвячаецца Стасі Міронцавай

(малюнак Стасі Міронцавай)

ЛІТАРАТУРНАЕ...

 

31.03.2022

Вы маё

Каханьне -

Чымсьці сумнае,

Але прыгожае,

Бязьмежнае,

Літаратурнае...

ВЕРШЫ

01.04.2022
 
Вершы
 
Калі ўсё выбухне,
І зьменіць рух Зямля,
У велічы бязьмежнай
Сьвет адчуе гук першы…
 
Апошні з выжыўшых
Пачуе шэпат ціхі
Ў кучы вугальля…
……………

І гэта будуць Вершы…

 

संसार

 

02.04.2022
 
Да неба цягнуліся,
Пабудавалі свой Вавілон…
Аднойчы патрапіўшы ў Рай,
Мы б больш на Зямлю
Не зьвярнуліся.
Толькі пакінуўшы цела,
Мы аджываем у новым –
Сансары закон.

ДА ЗОР

 

05.01.2022

 

Сёньня прысьніліся

Хвалі –

Неба

Й птушкі белыя –

Звалі

Ў ноч –

Несканчо́ны прастор,

Сёньня жывы –

Да зор.

Only from you

 

30.03.2022

Будуюць змовы
Неба з безданьню –
Я не існую…
 
Пачую словы
Пра “Кахаю” й “Люблю”
Only from You…

МЯЖА АДЗІНОТЫ

 
29.12.2021
 
Шукаю мяжу
Сваёй
Адзіноты…
Што гэта?
Крыжыкі?
Ноты?
 
Літары.
Я дапішу,
Але,
Потым…

РАЙ

16.01.2022  Цыкл Ілюзія...
 
Рай
 
Я напішу колькі-сь літар
Ня модных.
Хай  паміж намі бессань –
Паперы сьпісанай гай…
 
Я пражыву кожны момант
Свабодным
Хай паміж намі бездань –
Паветра над ёю Рай.

 

Каханьне

 
19.03.2022
 
Нічога няма
Гучней за маўчаньне,
За погляды ўпотай,
Усьмешкі й
Думкі – спатканьні.

Не Згасаць!

27.02.2021

(З праекту @100_days_love)

 

Столькі нам толькі бачных сьценаў

Збудаваць,

Бясконца побач крочыць,

Адно аднаго чакаць,

Шукаць…

У адзіноце…

Адчуваць,

Жадаць, і,

Кожным днём,

Імкнуцца ўвысь,

І не згасаць…

 

Імя тваё - Каханьне

 

06.02.2022

Імя тваё - Каханьне 

(Цыкл Ілюзія)

 

Так проста зьнікнуць –

Не адчуе страты Сьвет.

Імя тваё –

Ў каменьні

Кімсьці выбітыя літары,

І, можа, больш ніхто ня ўспомніць…

 

Так проста зьнікнуць –

Не пасьпець купіць білет.

Імя тваё –

Каханьні,

Кімсьці выбітыя лічбамі,

І, можа, больш ніхто ня ўспомніць…

Каханьне - Пах

 

21.03.2022

 

Адлегласьць у думках,

Адлегласьць у снах,

Адлегласьць у літарах –

Час у нашых руках.

Каханьне –

Ворах?

Пах…

Каханьне й Кроў

 

21.03.2022

 
Каляровая бездань
На фота пражытых часоў…
Там каханьні й кроў
Адным колерам,
Толькі празрыстым любоў.

Каханьнем адным

  

23.03.2022

 
Затулі мяне,
Схавай у цемры,
Закружы ў танцы!
Хай ліецца ноч
За шыбамі –
Распусьцімся ў  дым…
 
Забяры мяне,
У лёце сэрцаў
Злучымся ў танцы!
Ўсе нягоды збоч!
Каханьнем
Зробімся адным…

Разам

 
23.03.2022
 
Дотыкі ніколі не змаўкаюць –
Целаў блізкасьць, абяцаньні “Назаўжды”…
Ў кожнае зь імгненьняў РАЗАМ
Нараджаюцца й паміраюць
Літары – пачуцьцяў галасы.

💕💕💕

Твае Пацалункі

22.01.2022
 
Гукі нотавых спрэчак…
Трэскат сьвечкі сьвятла й думкі…
Забяры мяне, вечнасьць,
Я хацеў ба пазбавіцца сну,
Імгненьні свабоды –
Твае пацалункі…
 
Ў кожнай з мараў вясна,
Ў сьвеце красак абдымкі – пачуцьцяў гатункі…
Я гатовы бясконца слухаць
Шэпат роскі на золку,
Імгненьні ў кроку да сонца –
Твае пацалункі.

 

МЫ Й ЁСЬЦЬ БОГ

       Што б ні было,

Жыцьцё ня зьменіцца

Й не замарудзіць ход…

Сусьвет ня зьнікне,

Зоркі, як і сёньня,

Будуць ладзіць карагод…

Было б сьвятло,

Нас не зламаюць

Болю полымя й астрог…

Мы парасьцем з насеньня

Будзем зноў і зноў з’яўляцца

Ў гэты сьвет, бо

Мы й ёсьць Бог.

Я - МОВА

 Я - Мова

Я – 

Толькі слова ў цішыні,

А слова –

Гукі ў вышыні

Пачуцьцяў – 

Мова…

Я –

Бліскаўка ўдалечыні,

А Мова –

Сьлед у цішыні,

А сьлед –

Размова…

Нас Ня Будзе Больш!

 

02.02.2022

 

Нас ня будзе больш –

Сёньня мы птушкі…

Мары блакітныя:

Дом… Вакно…

Твары зь вясьнянкамі,

Сьлезы й пахаду́шкі...

Погляды...

Пацягушкі…

Віно…

 

А нас ня будзе больш.

Сёньня мы сьме́шкі…

Мяню́шкі пяшчотныя…

Сон… Кіно…

Мінушкі  цалункамі,

Абдымкі й вечару́шкі…

Мы...

Імгненьне…

Адно…

 

*

Вясьнянкі – вяснушкі,

Пахадушкі – клопат (у пахадушках – у клопаце)

Мінушкі – вясновая кветка

Сьмешкі – “шутки” (ж.мн)

Вечарушкі – “посиделки”

Track - Velocities - Sleepy Fish