Адны...

31.10.2021

 

Усе мы людзі адной Зямлі…

Усе мы разам, побач,

І, ўсё ж, адны… 

Гісторыя Здымкаў

 
27.10.2021
 
Як жывая легенда
Каханьня, абдымкаў…
Часам наша жыцьцё –
Гісторыя здымкаў…

Гэта Сон...

 

26.10.2021

 

Я з табой…

Гэта сон…

Пальцы ціха кранаюць паветра…

Мы падобныя чымсьці на дым,

Што згубіўся ў небе

З першым подыхам ветру…

Дзікая краска

 

22.10.2021

 

Дзікая краска

Ў прыродзе

Гарыць ярчэй!

Мне не кажыце

Яе назву,

Толькі

Колер вачэй…

Скрозь дым

 

22.10.2021

 

Скрозь дым

Гляджу ў пустату…

Я целам тут адзін

Сьвядома ў гэты час жыву…

Жыцьцё

21.10.2021

 

Мы ня бачым жыцьцё,

Праляцім толькі ўздоўж…

Існуем, нібы сьлед на вадзе,

Што пакінуў дождж… 

Я й мой цень

 

20.10.2021

 

Адкуль шэпат?

Нібы зь нябыту гукі…

Я спыніўся й стаю як пень…

Зьбегчы б! Не…

Мяне трымаюць нябачна рукі…

Разам будзем ноччу і ўдзень,

Я й мой цень…

Прыгажосьць

 

18.10.2021

 

Прыгажосьць гэта вера,

І каханьне навек…

Прыгажосьць наша мера,

Прыгажосьць ёсьць сусьвет!

Адчуваю - жыву...

 

18.10.2021

 

Крокі нячутныя…

Ціхія гукі…

Адчуваю – жыву…

 

Рэзананс на вадзе…

Ледзь кранаюць паветра рукі…

Сьлед на мяккім пяску…

А мне б...

 

11.10.2021

 

А мне б адчуць той смак

І пах паветра,

Мне б у неба

З хуткім ветрам…

Мне б яшчэ пабыць

Хоць трошку побач з домам, тым,

Дзе між сузор’яў зьнічка кожная –

Аб чымсьці сьветлым успамін…

Туман

 

14.10.2021

 

Густы шэры туман

Бы працяг нашых сноў…

Ён, хаваючы бруд і пакуты,

Зафарбуе аблокамі сьцены нашых дамоў…

Маўклівая ціш...

 

6.10.2021

 

Калі сплю,

Мне месяц сьпявае тое,

Пра што ты маўчыш…

Адчуваю,

Як зноўку

Сабе пакідаю мінуту,

І дагараю,

Зьнікае ў думках

Маўклівая ціш…

Лес І туман...

 

30.09.2021

 

Лес і туман…

Я тут адзін

Зь нежывых,

Я тут

Самападман…

Мэлёдый простых

Гук, і п’яны вецер

Штосьці сьпявае

Так ціха,

Нібыта я сам

Зрабіўся

Паветрам,

Згубіўся,

Як падае лісьце…

Іх мякка кранае мох,

І цьвіце дурнап’ян…

Лес і туман…

З Свабодаю

 10.10.2021

Пакіньце сабе

Сваё чорнае сонца.

Я той, хто брыдзе

Па дарозе адзін...

Праз літары й слова

Блукаю бясконца,

З свабодаю ў кожнай

З пражытых хвілін...

 

Зямля ў агні...

05.09.2021

 Зямля ў агні...

Гары...

Гары...

Усё згарыць,

А ты

Плыві

Да неба чыстага,

Да новай зямлі...

Атрымаю Сусьвет

 

8.10.21

Забяры мяне, Сонца,

І я атрымаю Свабоду…

Забяры мяне, Неба,

Я толькі пакіну сьлед…

Забяры ў мяне ўсё,

Хай вецер бясконца кружыць карагодам,

Аддаўшы сябе,

Атрымаю Сусьвет.

Каханьне

 

6.10.2021

 

Апошнім пачую твой голас ціхі,

І цела маё распускаецца ў дым…

Зьнікае ў нябыце ўсё,

Толькі кроплі на шчоках каханьня крык,

І я ў ім…

Адзінота

 5.10.2021

Забарабаніў дотыкамі дождж па шклу…

 Я дзесьці тут,

Пра гэта сьведчыць гучна адзінота…

Сьвет бязьмежны мчыць скрозь цемнату,

І кожны ў ім

Мэлёдыі жыцьця ня сыйграная нота…

Заўтра.

 27.09.2021

Заўтра наш прыйдзе час,

Заўтра працягнем бой,

Заўтра кожны з нас,

Заўтра ўсяк герой...

Толькі, дзе мы, а дзе заўтра?

Зараз жыві сабой!

Котка

 

29.09.2021

 

Я звонку, падобна, вожык,

Калючы да ўсяго…

А ў сэрцы вуркоча котка,

Схаваўшы ў сабе цяпло.